Toby Anbake, yon jèn atis k’ap lite pou fè yon non nan RAP la a. Non li se Owen Martinez FAVA.
Li fèt Pòtoprens, 3 novanm 1990 nan lopital « Azil Français », epòk kote lopital sa a te konn okipe l’ de militè yo ak fanmi yo. Li se dènye pitit sou twa pitit manman l’ fè ak papa l’ men katriyèm pitit papa l’. Rose Carmelle FAVA se pi gran an, li gen 38 lane, aprè l’ se Saint-Fleur FAVA, 32 lane, Nadège FAVA ki pa pitit manman Owen, ki gen li menm tou 32 lane. Papa l’ se yon militè ki rele Jean Sylvestre FAVA, yon nonm Okay, manman l’ se Elizabeth LOUIS. Avèk komès yo t’ap pratike yo rive fè edikasyon tout pitit yo. Toby grandi Okap. Li fè tout primè l’ nan Collège Le Phare, segondè l’ nan Collège Pratique du Nord. Aprè filozofi l’, li tounen Pòtoprens, vil kote l’ pran nesans, pou kontinye ak etid yo. Sa ki pral mennen l’ nan INUQUA (Institut Universitaire du Quisqueya d’Amerique) pou anbrase Syans Enfòmatik. Owen, aktyelman nan dezyèm lane. Aprè manman l’, tonton l’ Louissaint se moun ki pouse l’ plis nan vi an. Tonton sa a ki te ankouraje l’ nan legliz, li te vle wè jèn espwa Nò a nan RAP la pastè.
RAP se pi gwo pasyon Anbake. Pou w’ sa rive konprann pouki, li enpòtan pou w’ ta fè yon rechèch nan pase l’, sitou nan timoun li.
Toby grandi legliz. Pou n’ pi klè nan Advantis. Byen bonè, li ta pral konte pami manb koral pou timoun legliz li a. Avèk RAP la, Ragga a nan epok la ki t’ap fè pale de li ak gwoup tankou O.R.S, King Posse, elatriye, ki t’ap lite pou tandans sa yo jwenn respè nan sosyete a, taye yon plas, Toby tonbe damou mouvman an. Pwezi se yon bagay li te renmen anpil aprè mizik. Li te telman renmen pwezi, li te lanse l’ nan ekri l’ tou.
RAP ki se rim ak pwezi, pou jèn tankou Anbake, entegrasyon an pat difisil. Sa ki ta pral fè l’ jwenn plas sou yon sèn pou pèfòme nan lane 2004, Okap, nan Hot Saturday, yon program baskèt entèskolè ki te konn fèt epòk sa a. Li te gen sèlman 14 lane, li te nan nevyèm lane fondamantal. Depi aprè program sa a, Toby pa sispann fè fantik nan tout Nò a. Men ak liy paran li te ba l’ ki se legliz, sitou tonton l’ ki vle l’ pastè, bagay yo pat fasil ditou pou Anbake anbake tout bon vre sou bato siksè l’.
Malgre tout obstak li te jwenn sou wout li, li te kontinye san relach paske fè RAP se misyon l’ sou latè. Sa kif è nan lane 2012, li ta pral dekroche premye kontra l’ pou yon prestasyon l’ sou sèn an solo nan « Versailles ». Yon night club Okap ki trè apresye.
18 novanm 2012, dat jèn espwa Nò a nan RAP la pap janm bliye paske se pi bèl moman li konnen nan lavi l’ pase jou sa. Se pi gwo, pi bèl souvni li gen nan karyè l’. Yon weekend li te pase ak F-Ner, Doc Filah ki se 2 rapè li apresye anpil, li pran pou modèl, idol. Gras ak yon afich yo te pataje kote yo te trouve yo pandan yon weekend ansanm ap pale, diskite sou RAP, amize, bay blag, elatriye. Yon lot bagay nan moman sa, se akèy ak lanmou li te jwenn bò piblik la.
Atis la a pandan kèk lane li yo nan muzik, gen tan pase yon koral, yon gwoup muzikal ak yon Kolaboki se :
Chorale de la classe enfantine (1998-2001)
Colabo True MC, CTMC (2008-2010)
Virus (2009-2011)
Aktyèlman li se yon rapè solo men ki fè pati yon kolabo pou blòk Nò a depi 2010 ki se Northside.
Premye muzik solo l’ sòti nan lane 2010, tit la se « Anbake ».
Toby Anbake gen sèlman 23 lane, 3 novanm 2014 la a ap ba l’ 24. Li fè pati jèn rapè yo konnen nan moman an. Li pa sispann travay chak jou, lite pou fè plis bri pou plis moun ka konnen l’ toujou. Tout sa yo li rive fè yo san manadjè, san prodiktè. Se flanm lanmou sa a piu RAP ki anime l’ fè tout sa yo. Toby se gran espwa Nò a nan RAP la. Li gen rèv pou l’ sekwe tout peyi a ak RAP jiska rive nan zorèy sila yo ki nan peyi letranje yo, sitou sak pa aisyen yo. Pou sa, lap bezwen anpil sipò sitou nan men depatman li repreante a. Tout sak kwè nan li, jan nou ka temwanye l’ sa se anbake sou bato Toby Anbake a.
RPlayer
