Mizik Semèn Nan (Jiyè I): Inosan Yo – Roody Roodboy Feat. Baky
Pou yon dezyèm fwa Inosan yo Mizik Semèn nan sou www.dynastyhaiti.com Inosan Yo se yon mizik Roody Roodboy fè pou rakonte vi pa li kote li eksplike zòn kote l te grandi a Site Militè et fason ke anpil moun victim pou granmesi pami inosan sa yo li mansyone Papa li ke selon li menm ki tonbe anba bal mechan yo paske li te yon Gad. Se yon mizik ki gen sou li kòm envite Baky Popilè, pwoteje RKM Records la. Li pale de vyolans anpil Polisye sibi anba men bandi li rakonte istwa polisye kap viv nan zòn ke non rele Zòn cho yo. Li pale de batay ki genyen ant polisye ak Bandi e atis la ta swete sa chanje yon jou,
Mizik la dire 4:19. Li komanse avèk yon bridge( Bredj) ki dire 4 bars ke yon refren 8 Bars vin touswit aprè. Apresa nou jwenn premye verse(Vès) la ki dire 8 Bars apre sa nou jwenn refren an 16 bars . Verse Baky a vini apre li dire 12 bars ki konplete avèk yon 2e verse ke Roody Bay ki dire 16 bars. Epi nou jwenn mizik la ki fini avèk refren an.
Roody komanse 1e verse li a avèk pawòl ki pale de vi pal direktèman kote li pale de kote li te grandi e dekri istwa papa l.
« Site Militè pa yon vye zòn
Landan l mwen grandi papa m se t’on poto pilòn
Al tire , m pa konn si se Badman ou babilòn
Pouki Bondye kite tout pouvwa sa yo nan men lezòm »
Se konsa atis la dekri sitiyasyon ke l petèt te viv padan moman ke papa l te toujou egziste . li eksplike tou nan verse sa koman papa l mouri. Se yon verse ki gen anpil santiman pèsonèl. Li pwofite montre nan sosyete a depiw mouri w antò :
« Depiw Mouri w antò
Papa m pa la ankò » se konsa atis la fini premye verse la
Refren an di konsa
Badman yo la yap obsève
Kilè yon babilòn ap vin fè erè
Babilòn yo la yap obsève
Kilè yon badman ap vin fè erè
Youn ap veye lòt Youn ap veye lòt oh oh (4x)[2x]
Apre sa nou jwenn Baky ki rantre ak yon verse ki rich ak vè miltisilabik , kalanbou ak anpil lòt figi ki pou leve fason rapè a ekri a. li di yon gwo pawòl nan verse sa ki se
« Chak nèg te ka bandi nan lavi l’ si l’te vle
Men l konnen depiw komanse kouri la wap kouri nèt
Bon ann serye sak ofri w plis kòb se li w kouri w vote a
E fi k parèt pi fèb la se li w pral kouri ote a
E m wè, sak di verite se liw kew minote a
Konbyen nan nou k gon zanmi k viktim nan kominote a» Baky nan 2e verse la
Gen anpil kèk bèl pawòl nan verse pa Baky a tankou 2 denye Bars misye fini verse li a ki se
« Ou ka pa koupab nan lavi tandis kew peye
Chak inosan w kondane son bandi w anplis kew kreye”
Touswit nou jwenn 2e verse Roody a ki gen anpil verite , anpil reyalite ke anpil moun kap viv nan zòn cho yo m nan katye defavorize yo konnen tankou lè atis la di
Badman oblije al pran pwen pou l sèvi
Babilòn bliye si l’ la pou pwoteje e sèvi
Anmwey malerèz ap kriye
Anmwey elèv lekòl ap tonbe
Mwen mande jistis pou inonsan k penitansye yo
Mande jistis pou polisye ki tonbe mal yo
Apre sa nou jwenn yon refren ki travay sou yon tonalite ki pa tro cho pou pèmèt nou santi ekspresyon ak feeling kap travèse atis la
An gwo se yon mizik ke anpil moun ta sipoze koute nan memwa tout sa ki tonbe mal yo se yon prodiksyon de Gwo Bout Mizik Empire ki se nouvo label ke atis la ap travay la. Beat Mizik se yon bèl konpozisyon ki vrèman antrènan Siw poko telechaje mizik la mwen envite w fe sa koulyea sou
https://dynastyhaiti.com/inosan-yo-roody-roodboy-ft-baky-popile/ paske se yon mizik ki vreman rakonte reyalite peyi nou.
